La Chanson de Roland/Léon Gautier/Édition populaire/1895/Appendices/1

Léon Gautier La Chanson de Roland Vingt-deuxième édition Édition populaire - 1895 Préface - Introduction - Traduction et commentaires - Éclaircissements - Appendices Fragments de texte original - Traduction interlinéaire

Facsimilés

Fragments du texte original

Le conseil de Charlemagne

Vers 96 - 365

96 ->

O. => VIII

Li Emperere se fait e balt e liet :
Cordres ad prise e les murs peceiez,
Od ses cadables les turs en abatiet.
Mult grant eschec en unt si chevaler
D’or e d’argent e de guarnemenz chers.
En la citet nen ad remés paien
Ne seit ocis u devient chrestiens.
Li Emperere est en un grant vergier,
Ensembl’od lui Rollanz e Olivers,
Sansun li dux e Anséis li fiers,
Gefreis d’Anjou li reis gunfanuners ;
E si i furent e Gerins e Gerers :
Là ù cist furent, des altres i out bien.
Asez i out des barbez e des vielz
Des Francs de France i ad quinze milliers.
Sur palies blancs siedent cil chevaler,
As tables juent pur els esbaneier,
E as eschecs li plus saive e li veill ;
E escremissent cil bacheler leger.
Desuz un pin, delez un eglenter,
Un faldestoed i out, fait tut d’or mer,
Là siet li reis ki dulce France tient ;
Blanche ad la barbe e tut flurit le chef,
Gent ad le cors e le cuntenant fier.
S’est ki l’demandet, ne l’estoet enseigner.
E li message descendirent à pied,
Si l’saluèrent par amur e par ben.	Aoi

---

Voir aussi

Notes de la rédaction