AMPLorr, charte FR AD088 E dpt 379 AA1 n 1

page en cours d'installation

Démonstration sur les chartes en Lorraine Cette page fait partie d'un ensemble démonstratif sur l'utilisation de technologies numériques sur la thématique des chartes en Lorraine . Cette page est une maquette de faisabilité pour l'adaptation de la description d'une charte transcrite en TEI vers un réseau de wiki sémantique. La description TEI est visible ici : Wicri Lorraine:AMPLorr, charte FR AD088 E dpt 379 AA1 n 1

La charte

600px

Une transcription

Je Ferris, duc de Loherreigne et marchis, fas savoir a tous que li abbez et li covens de Moïenmostier, de l'ordre Saint Benoit, de l'esveschiei de Toul, font et ont fait communitei et compaignie a moi, por moi et por mes hoirs aprés

moi a tous jours, de ceu qu'il avoient en ban de Vyzevauls et en ban de Ravon entierement, des le ru de Molleroi ensi com il chiet en Murt, jusque a la haute bonne qui est entre le ban de Bertrichamp et de Ravon, et dés le ban de Cellecontre Vaul

jusques au ru de Molleroi, ensi com les soies des costes gettent eawe vers la riviere de Vyzevauls, fors les plains et les ewaus des montaingnes ou qu'il soient, por faire une Nueveville a Ravon, en la quelle li dit abbez et covens averont la

moitié et je et mi hoir aprés moi, l'autre moitié. Ne n'i porrons je ne mi hoir aprés moi rien acroistre sans les dis abbé et covent, ne li dit abbez et covens sans moi et sans mes hoirs aprés moi. Et avec les plains et les ewaus devant dis retinent

li dit abbez et covens, en la dite Nueveville, par devant le patronage, le don et le trait de l'iglise de la Nueveville de Ravon et la chapellerie de la chapelle dou chastel de Belreswart, se je ou mi hoir aprés moi enni faisions point les gros

dismes et les menus et toutes les chozes espirituels quels qu'elles soient, et six vins jours de terre arable et vint fauciees de prei ou qu'il les verront panre por le waingnage de la maison de Ravon, fors que en siege de La Nueveville. Et

retinent encor li dit abbez et covens la maison de Ravon entierement, les jardins, et les meises, et le porpris, et l'ospitaul de Ravon, le clos et le siege dou leu entierement et environ ensi com elle est, et le pasturage et le paxonnage por les bestes

et por les pors de la maison, et l'usuaire es bois dou ban de la dite Nueveville por toutes les necessités de la maison de Ravon devant dite, ensi que je ne mi hoir aprés moi, ne nostres commandemens ne poons riens mesfaire, ne riens panre, ne faire panre, en la maison

devant dite de Ravon, rien és biens de la maison, sauf ceu que maisons et les chozes dessus dites demorent en ma warde et en la warde de mes hoirs aprés moi a tous jours. Et li chastels de Belrewart dessus Ravon, li chamin, li condut et li paage demorront a moi et a

mes hoirs aprés moi a tous jours, dou quel paage li homme de l'eglise de Moïenmostier sont et seront quite en la dite Nueveville et en ban. Li quels chastels doit a tous jours demorer a la duchiei, ne nou poons je ne mi hoir aprés moi, mestre en autrui main qu'il ne de

morce a tous jours a celui qui iert dus et sires de la duchiei. Et je et mi hoir aprés moi, et tuit cil qui seront menant en dit chastel de Belrewart, averons et doïens avoir le pasturage et le paxonnage por les bestes et por les pors dou dit chastel en ban

de la dite Nueveville, et l'usuaire ens bois don ban de la dite Nueveville por toute la necessitei dou dit chastel et de ciaus qui i seront demorant, por toutes les necessités qu'il en averont au leu. Et je et mi hoir aprés moi averons encor dix fauciees

de prez en ban de la dite Nueveville, et les doïens panre ou que nos vorrons en dit ban, aprés ceu que li dit abbez et covens averont pris lor vint fauciees devant dites. Et est a savoir que se li home de l'iglise de Moïenmostier meffasoient riens au chamins

en ban de la dite Nueveville de Ravon, je et mi hoir aprés moi, averiens la moitié de l'amende et li abbés et li covens dessus dit l'autre moitié. Et c'il meffasoient aus autres chamins dedens les bans de villes de l'eglise de Moïenmostier, li abbez et li

covens dessus dit averoient l'amende toute sans partie de mi et de mes hoirs aprés moi, ne riens n'en averont d'autres gens que des lor. Ne ne poons, ne ne devons je ne mi hoir aprés moi, retenir nuns des homes les dis abbez et covent en la dite

Nueveville de Ravon se par aus non. Ne il ne pueent ne ne doient retenir en la dite Nueveville de Ravon nuns de mes homes, ne des homes a mes homes, ne des homes de mes fiés, ne de mes wardes, se par moi non, ou par mes hoirs aprés moi.

Et se li home de l'iglise de Moïenmostier dessus dite aloient a lor entrecours et de lor entrecours revenoient a la dite Nueveville de Ravon, li heritage et li censaul qu'il tanroient de l'iglise de Moïenmostier demorroient a l'iglise dessus dite. Et doie

je et mi hoir aprés moi, mettre maïour et justice en la dite Nueveville a l'une des annees et li dit abbez et covens, l'autre annee aprés ensuiant, et ensi adés a tous jours. Et por ceste communitei et ceste compaingnie ai je donei, otroïei et acquitei, donne,

otroie et aquit por moi et per mes hoirs aprés moi a tous jours au dis abbei et covent tout quanque je et mi hoir aviens, avoir poïens et deviens a Moïenmostier et en ban, et ens villes et ens bans apartenans a Moïenmostier devant dite et ens

bans. Et tout ceu que je et mi hoir aviens, avoir poïens et deviens a Barbonville et en ban, et a Sainte Marie et en ban, tout entierement sans riens a retenir, et l'ome d'Acei et ses hoirs que je avoie en la rue l'abbei ai Acei, sauf la warde de l'iglise

de Moïenmostier et des leus dessus dis qui demorent a moi et a mes hoirs aprés moi a tous jours, et le commun cri de la terre sans maulenging et sans oquison de moi et de mes hoirs aprés moi. Et les serjans et le charroi en tel meniere, c'est a

savoir : quatre vins serjans et six chers, chaucun a six bues le moins, ou a dous chevaus ens os et en chevauchiees ou mes cors iert, ou li cors de celui qui iert dus et sires de la duchiei. Et li serjans qui n'i vanroit, qui fauroit dou compe des quatre

vins serjans devant dis, païeroit dix sols de toulois. Et li chers qui fauroit dou compe des six chers devant dis, païeroit ausi trente sols de toulois que li abbés et li covens dessus dit me doient faire païer a moi ou a mes hoirs aprés moi, ou a nostre

commandement. Et se il non faisoient, je, et mi hoir aprés moi, les en porriens wagier ou faire wagier sans meffaire. Et fors les trois homes que je ai a Barbonville, c'est a savoir Olriet, Jenin et Huesson, qui me serviront moi et mes hoirs aprés moi

toutes lor vies, et lor hoir serviront et demorront a l'iglise de Moïenmostier si tost com il vanront a lor conduit, s'il sont demorant a Barbonville. Ne je, ne mi hoir aprés moi, ne nos poons ne ne devons jamais acroistre ens bans et ens ville dessus

dites de Moïenmostier, de Barbonville et de Sainte Marie, riens aus apartenances des bans et des villes dessus dites, et fors le larron et le murtrier des homes de l'iglise de Moïenmostier, lesquels li justice de l'iglise de Moïenmostier devant dite

doit demener, justicier et jugier au drois et aus us et au costumes des villes et des bans de l'iglise de Moïenmostier. Et puis les doient delivrer a ma justice por tels com il seront. Et de quelle hore qu'il les eussent ensi delivrei, il

en seroient quite, et la remenance de tels doit demorer entierement a l'iglise de Moïenmostier sans partie d'autrui. Et se aucuns des homes de la dite englise de Moïenmostier estoit restus ou pris en ma terre por fait dont il deust

estre deffais, et il estoit requis par l'abbei ou le covent de Moïenmostier ou par lor certain message, je et mi hoir aprés moi ou nostre commandemens lor devons delivrer por justicier, si com drois ceroit, et puis le doient delivrer a ma

justice por faire ensi com il est devant devisei. Et est encor a savoir que je, ne mi hoir aprés moi, ne poons ne ne devons jamais fermer, ne faire fermer par nos, ne par autrui, chastel, donjon, ne forteresce ens heritages ne ens tresfons de

l'iglise de Moïenmostier, ne a Haute Pierre, n'en aillours ens leus qui sont de ma warde. Et se autres li voloit fermer je et mi hoir aprés moi le devons deffendre et destorner loïalement et en bone foi. Et s'il avenoit que li home de l'iglise

de Moïenmostier eussent aucune choze a faire a mes homes ne li mien au lors, chaucuns averoit l'amende et la defection de son home, chaucuns en son leu, selonc ceu que il i affierroit. Et se aucuns de mes homes faisoient force, tort ou

outrage aus villes ne au bans de l'iglise de Moïenmostier, la justice dou leu ou li meffais seroit fais le doit faire a deffaire au drois, aus us et au costumes dou leu, et les puet retenir jusques a droit tant qu'il aient deffait le

meffait que fais i seroit, ne n'en seroit ne n'en deveroit estre la dite justice oquisenee ne reprise de moi ne de mes hoirs aprés moi, ne de nostre commandement. Et des homes de l'iglise de Moïenmostier autre tel en mes bans et en mes leus

et en bans et en leus de mes hoirs. Et doient toutes les chozes et les covenences demorer en lor valour a tous jours sans alleguer us ne tenour que moi ou mes hoirs aprés moi porroient aidier et a la dite englise de Moïen :mostier et aus homes de la dite englise grever, selonc la forme dessus dite. Et est encor a savoir que je ne mi hoir aprés moi, ne nostre commandemens, ne poons ne ne devons aler encontre ces chozes en tout ne en partie.

Et se je ne mi hoir aprés moi aliens encontre ces chozes et ces covenences dessus dites, en tout ne en partie, ou aucune d'elles, je et mi hoir aprés moi ou nostre commandemens le devons deffaire et faire deffaire a la requeste

de l'abbei et dou covent de Moïenmostier devant dis ou de lor certain message, dedens les quarante jours qu'il seroit requis a moi ou a mes hoirs aprés moi ou a nostre commandemens. Et se je n'en estoie au leu ou en paÿs,

cil qui seroient et qui demorroient en leu de moi ou de mes hoirs aprés moi en paÿs, le doient deffaire ou faire deffaire dedens le termine dessus dit, puis qu'il en seroient requis de l'abbei ou du covent devant dis ou de

de lor certain message. Et se je ou mi hoir aprés moi, ou nostre commandemens, aliens encontre ces chozes et ces covenences dessus dites, ou aucune d'elles, je me sui mis et mes moi et mes hoirs aprés moi en la juridition mon

signor l'evesque de Toul et de son officiaul. Et vuel et me consent por moi et por mes hoirs aprés moi que aprés le termine des quarante jours davant dis, se je ou mi hoir aprés moi, ou nostre commandemens, n'en l'a

viens deffait, que li officiaus de Toul controingne moi et mes hoirs aprés moi, et nostre commandement, qui en seriens requis par sentence d'escomuniement en noz persones et d'entredit en noz fames et en noz maingnies

et en nostre terre. Et vuel que les sentences ensi mises sor nos, sor noz fames, sor noz maingniees et en nostre terre et sor nostre commandement, qu'il les facent agraver selonc droit. Et toutes ces chozes et ces cove

nences devant dites, ai je promis par ma foi corporelment donee et jurei sor le cors Nostre Signor Jhesu Crist et sor sains a tenir et a warder, et a faire tenir et a warder por moi et por mes hoirs aprés moi permenable

ment, fermement et entierement, ensi com elles sont faites et devisees, en bone foi et loïalment. Et vuel et otroi por moi et por mes hoirs aprés moi que nostre prevost, qui sont et seront plus prochien au leus et au bans devant dis

de l'iglise de Moïenmostier et cil qui cerat wardains, prevost ou souverains por warder le chastel de Belreswart dessus Ravon jurent sor sains, a la requeste des dis abbei et covent ou de leur certain message, a tenir et a

warder toutes ces chozes et ces covenences dessus dites. Et a tant com a toutes les chozes dessus nommees ai je renonciei por moi et por mes hoirs aprés moi, et renons especialment et expressement a l'exception de deception, a bene

fice de restitution entiere, a tous drois escris et nonescris, de loi et de canon, a tous privileges empetrés et ai empetrer, a tous usages, a toutes costumes, a toutes tenours, a tous drois de chevaliers, a toutes exceptions

quels qu'elles soient especialment et expressement qui moi et nos hoirs aprés moi porroient aidier en aucun tens et au dis abbei et covent grever en cest fait. En tesmoingnage de veritei et por ceu que ce soit ferme choze

et estable ai je mis mon sael en ces presentes lettres avec le sael de la court de Toul qui i est mis par ma proïere et par ma requeste. Et nos, officiaus de la court de Toul devant dite, avons mis le sael de la court de Toul en ces pre

sentes lettres avec le sael l'onorable baron Ferri, duc de Loherreigne et marchis devant dit, a la requeste et a la proïere dou duc, de l'abbei et dou covent devant dis, les quels lettres furent faites quant li miliaires cor

roit par mil dous censetsexanteetdixetnuefans, en moix de junet.